તારી ઈચ્છા પૂરી થાઓ.

રવિવારે ડુંગર પર જઈને આવ્યા પછી અમે બધા ખૂબ જ આનંદમાં હતા. સોમવારે સવારે ફરીથી મેદાનને સમથળ બનાવવાના કામમાં અમે લાગી ગયા. જીવનમાં ક્યારેય શારીરિક કામ કરવાની જરૂર ઉભી નહોતી થઇ એટલે શ્રમનું મૂલ્ય અને મહિમા અમને ક્યાંથી સમજાય! પરંતુ, સાગબારા આવ્યા પછી અને એક અઠવાડિયું સતત કામ કર્યા પછી હવે અમને શ્રમનું મૂલ્ય અને મહિમા સમજાવવાની જરૂર નહોતી. ત્રિકમના ઘા કરીને અને તગારા હાથમાં પકડીને અમારા હાથના પંજાઓમાં છાલા પડી ગયા હતા અને બાવળાઓમાં ગોટલા બાઝી ગયા હતા આમ છતાં, યુવાનીનું જોશ અને સંન્યસ્ત જીવનમાં આગળ વધવાની તમન્ના અમને પાનો ચઢાવવા માટે પૂરતા હતા. 

જોશ અને ઉમંગભેર અમે અમારું કામ આગળ ધપાવ્યે રાખ્યું આમ છતાં, સતત અને એકધાર્યા શારીરિક કામને કારણે બે દિવસ પછી જ થાકીને આ કામને બદલે કંઈક નવું કરવાનું મળે એવી લાગણી જોર પકડવા માંડી. અમારી લાગણીને જાણે કે પામી ગયા હોય એમ ગુરૂવારે સવારે અમારા ઉપરીએ જાહેરાત કરી કે આ રવિવારે આપણે કોડબા ડેમ પિકનીક ઉપર જઈશું. વાહ! અમને તો દોડવું હતું ને ઢાળ મળી ગયો. પાણીમાં ધુબાકા મારવાની કલ્પના માત્રથી અમે એવા તો રોમાંચિત થઇ ગયા કે બાકીના ત્રણ દિવસ કેમના પૂરા થયા એની ખબર ન પડી.

રવિવારે સવારે છ વાગ્યે અમે પાણીની બોટલ અને એક જોડી કપડાં લઈને કોડબા ડેમ ભણી ચાલતાં ચાલતાં પ્રયાણ કર્યું. કોડબા ગામમાં પણ ઇસુસંઘીઓનું રહેઠાણ હોવાથી બીજી કોઈ વ્યવસ્થાની ચિંતા કરવાની અમારે જરૂર નહોતી. કોડબા ગામ સાગબારાથી લગભગ બાર કિલોમીટર દૂર આવેલું છે આથી ચાલતા જઈએ તો બે થી અઢી કલાકનો સમય લાગે. સવારનું વાતાવરણ શાંત અને ખુશનુમા હતું. જગલ અને ડુંગરોમાંથી પસાર થતો ધૂળિયા હાઈવે વળાંકો અને ચઢાણને કારણે વધારે સુંદર જણાતો હતો. કુદરતના એ અદ્ભુત વૈભવને માણતા માણતા અમે ઝડપથી કોડબા ગામે પહોંચી ગયા. ત્યાંના સંચાલક અમારી કાગડોળે રાહ જોઈ રહ્યા હતા. મનભાવતો નાસ્તો તો એમણે આપ્યો જ સાથે સાથે પોતાના સ્થાનિક લોકો સાથેના હૃદયસ્પર્શી અનુભવો અમને સંભળાવીને અમારી સંન્યાસી બનવાની ઈચ્છાને વધારે બળવતર બનાવી દીધી.

ચાતકની પેઠે અમે જે ક્ષણની અમે રાહ જોતા હતા એ ઘડી હવે આવી પહોંચી હતી. કોડબા ડેમની બીજી બાજુએ અમે ચડ્ડીબંડીમાં સજ્જ થઈને પાણીમાં ધુબાકા મારવા માટે તૈયાર હતા. કિનારા પર પાણીની ઊંડાઈ ઓછી હતી આમ છતાં, કોઈ અઘટિત બનાવ ના બને એ માટે જેને તરતાં નહોતું આવડતું એવા પંદરેક જણને હાથમાં ટયૂબ પકડી રાખવાની કડક સૂચના સાથે પાણીમાં ઉતારવાની પરવાનગી મળી. પાંચ જણા વચ્ચે એક ટયૂબ હાથમાં આવી. ટયૂબને પકડીને અમે અમારા પગ આમતેમ હલાવવાનું શરૂ કર્યું. બરોબર એજ સમયે અમારામાંના કેટલાક નિપુણ તરવૈયાઓએ પાળી ઉપરથી ભૂચકા મારવાનું શરૂ કર્યું. આ જોઇને અમે પણ ગેલમાં આવી ગયા ને એક હાથે ટયૂબનો આધાર ને બીજે હાથે એકબીજા પર પાણીની છોળો ઉડાડવાની શરૂઆત કરી. પાંચેક મિનીટ વીતી હશે ને મસ્તીમાં ને મસ્તીમાં કઈ પળે મારા હાથમાંથી ટયૂબ છટકી ગઈ એનું મને ભાન ન રહ્યું. પગ હલાવવાને કારણે અમે ઘણાં અંદર આવી ગયા હતા આથી જેવો ટયૂબનો આધાર ગયો કે મારુ શરીર પાણીમાં ગરકાવ થવા માંડયું. અમારા  ઉપરી અને સાથીઓને શું બની રહ્યું છે એની જાણ થાય એ પહેલા તો હું ગળાબૂડ પાણીમાં ઉતરી ગયો હતો. મેં બૂમો પાડવા માંડી ને માથાના ભાગને પાણીની ઉપર રાખી મૂકવાનો પ્રયત્ન કરી જોયો. પણ ન તો કોઈએ મારો અવાજ સાંભળ્યો કે ન તો હું મારી જાતને સંભાળી શક્યો. થોડું ઘણું પાણી પી લીધા પછી હું ઝડપભેર પાણીમાં ગરકાવ થઇ રહ્યો હતો ને મારી જાણ બહાર કોઈ અજાણ્યો હાથ મારી બંડીને ખેંચી રહ્યો હતો. બચવાની કોઈ આશા નહોતી ને અણીની એજ ક્ષણે મને બાળપણમાં અમે શ્વાસ રોકીને નહેરમાં ડૂબકી મારતા હતા એ યુકિત યાદ આવી ગઈ. પ્રયત્નપૂર્વક મોને બંધ રાખીને મેં શ્વાસને રોકી રાખ્યો ને છેલ્લે છેલ્લે પ્રભુનું સ્મરણ કરી લીધું;"હે પ્રભુ, મારી જાતને તારા હાથમાં સોંપું છું. તારી ઈચ્છા પૂરી થાઓ." બીજી જ ક્ષણે જાણે કે મારી સમર્પિત ભાવવાળી પ્રાર્થનાનો પ્રત્યુતર ના મળ્યો હોય એમ એક હાથ મારા શરીર પર વીંટળાયો ને બીજો હાથ મારી નીચે રહેલા માથાને ઘડીના છઠ્ઠા ભાગમાં ઉપર ખેંચી લાવ્યો. કિનારે આવ્યા ત્યારે હું બિલકુલ ભાનમાં હતો પણ મારો સાથી ઘણું બધું પાણી પી ગયો હતો અને આઘાતને કારણે એને કળ વળતા ઘણી વાર લાગી.

મસ્તી કરતાં કરતાં અમે બે જણા ઊંડા પાણીમાં ગરકાવ થઇ ગયા હતા જેની જાણ અમને કોઈનેય નહોતી. પરંતુ, અમારા ઉપરીને જેવી કંઈક અજુગતું બની રહ્યાની ગંધ આવી કે તરત જ એમણે બે હાથ ફેલાવીને મારા ભણી ડૂબકી મારી હતી. મને તો એમણે ઝડપથી શોધી કાઢયો પરંતુ, એમનો બીજો હાથ અનાયાસે અજાણ્યા માથા પર જઈ  પહોંચ્યો હતો. કિનારે આવ્યા પછી જ એ કોણ હતું એની અમને બધાને જાણ થઇ.  

કોડબા ગામમાં પાછા ફર્યા ત્યારે એકબાજુ આવી જીવલેણ ઘટનાનો ભય અને બીજી બાજુ મોતને હાથતાળી આપીને આવ્યાનો આનંદ અમારા ચહેરા પર છલકાઈ રહ્યો હતો.